Nos Eskudo ta protehá nos isla.

​

Dia 6 di sèptèmber 2026 nos ta selebrá Dia di Boneiru. E aña akí nos selebrashon tin nos eskudo komo tema sentral, selebrando 40 aña di su eksistensia na Boneiru. Nos eskudo ta un símbolo ku ta konta historia di nos isla, di nos identidat, di nos balornan i di nos responsabilidat komo pueblo.

​

E idea tras di nos lema ta ku nos eskudo ta protehá  nos isla. Pero protekshon no ta solamente algu ku un símbolo ta representá. Nos mes, komo boneriano, ta protehá otro. Nos ta protehá nos komunidat ora nos ta sostené otro, ora nos ta partisipá, ora nos ta kompartí nos talento i ora nos ta traha huntu pa Boneiru.

Tambe nos ta protehá nos isla ora nos ta kuida nos naturalesa, nos kultura, nos produktonan lokal i nos tradishonnan. Dia di Boneiru ta un momento pa mustra tur loke Boneiru tin di ofresé i pa duna nos empresarionan, nos kreadónan di arte i nos bendedónan lokal oportunidat pa presentá nan produkto na pueblo.

​

P’esei awe mi ta hasi un yamada na tur persona, tur empresario, tur fundashon i tur organisashon ku ta interesá den un stènt di benta durante selebrashon ofisial di Dia di Boneiru, dia 6 di sèptèmber 2026, pa inskribí.

Nos ta buska stèntnan ku ta representá diversidat di Boneiru: kuminda i bebida lokal, artesania, arte, kultura, produkto kreativo i otro inisiativa ku ta kontribuí na un ambiente festivo, sigur i atraktivo.

Ku bo partisipashon, bo no ta solamente bende un produkto. Bo ta kontribuí na nos selebrashon, bo ta sostené nos ekonomia lokal i bo ta yuda protehá i fortalesé loke ta hasi Boneiru úniko.

Mi ta invitá tur hende ku ta interesá pa inskribí na tempu i pa forma parti di e selebrashon spesial akí.

​

Dia di Boneiru ta di nos tur. Laga nos selebr’é huntu, ku orguyo, ku respet i ku amor pa nos isla.

Nos eskudo ta protehá nos isla. Nos ta protehá otro. I huntu nos ta protehá Boneiru.